Швајцарската полиција соопшти дека е отворена кривична истрага против двајцата сопственици на барот во ски-центарот Кран-Монтана, каде што на новогодишната ноќ животот го загубија 40 лица, а 119 беа повредени.
Сопствениците, брачниот пар Жак и Џесика Морети од Франција, се обвинети за убиство од небрежност, предизвикување телесни повреди од небрежност и предизвикување пожар од небрежност, соопшти полицијата на кантонот Вале. „Презумпцијата на невиност важи додека не се донесе правосилна пресуда“, нагласија властите.
Првичните истражни резултати покажуваат дека пожарот избувнал откако искри од „прскалки“ (party fountains) поставени на шишиња со пијалок го запалиле таванот обложен со звучна изолација. Огнот се проширил многу брзо, а експертите веќе ја поставија дилемата дали барот имал доволно излези за итни случаи и дали материјалот на таванот бил во согласност со законските норми.
Моретијците изјавија дека се скршени од трагедијата и дека целосно соработуваат со властите за расветлување на настанот. По завршувањето на првичните истраги под надзор на јавното обвинителство на Вале, синоќа официјално беше покрената кривична истрага против управителите на барот.
