Здружението за заштита на животните „Анима Мунди“ излегува со сериозно и вознемирувачко јавно предупредување: во Скопје, според нив, се одвива организирана и добро координирана операција за нелегално внесување и дислокација на кучиња, што претставува и суровост кон животните и директна закана по јавната безбедност.
Како што информираат од здружението, во општина Карпош во изминатите денови ненадејно се појавила цела нова глутница кучиња. Станува збор за животни кои граѓаните не ги препознаваат, кои не биле дел од постоечката улична популација и кои, според сведоштвата од терен, се појавиле буквално преку ноќ. Дополнително загрижува фактот што кучињата се нестерилизирани и необележани, што, според „Анима Мунди“, недвосмислено укажува дека не станува збор за природен прираст, туку за насилно преместување.
„Одговорно тврдиме дека ова е организирано внесување кучиња. ЈП ‘Лајка’ нема ниту оставено, ниту испуштено ваква бројка нестерилизирани и необележани животни на ниту една локација во Скопје. Луѓето со години ги познаваат кучињата во своите маала – овие не се тие“, велат од здружението.
Ситуацијата добива уште посериозна димензија откако активисти на „Анима Мунди“ на терен пронашле кучиња со ушни маркици од Република Албанија, слободно пуштени на улиците на Скопје. Овој наод, според нив, отвора сомнеж за нелегален, па дури и прекуграничен транспорт и напуштање на животни – кривично дело кое досега очигледно поминувало без санкции.
Од здружението бараат итна реакција од институциите. Конкретно, тие повикуваат на целосна проверка на сите јавни и приватни безбедносни камери на локациите каде што кучињата се појавиле, како и на влезно-излезните правци кон главниот град. Очекуваат МВР и Јавното обвинителство да утврдат кој стои зад транспортот, од каде потекнуваат животните и кој ги истовара на улиците на Скопје.
„Ова не е изолиран инцидент, туку логистички испланирана активност. Масовното напуштање и дислокација на кучиња е суровост, но и сериозна општа опасност“, предупредуваат од „Анима Мунди“.
Здружението потсетува дека со години алармира за законските празнини и институционалната незаинтересираност. Тие веќе поднеле конкретни предлози за измени на Законот за заштита и благосостојба на животните, со цел построго регулирање на сопствеништвото на кучиња, како и измени на Кривичниот законик, со кои напуштањето миленик, суровоста и предизвикувањето општа опасност би се третирале како кривични дела – по примерот на Хрватска.
Паралелно, „Анима Мунди“ упатува итен јавен апел до ЗЕЛС, со барање ова прашање да се отвори на ниво на сите градоначалници. Според нив, секоја општина мора да ја третира проблематиката со уличните кучиња на хуман и законски начин – преку масовна стерилизација, прецизна евиденција и строги санкции за секој облик на незаконско дислоцирање.
„Ниту ‘Лајка’, ниту кое било јавно претпријатие не може самостојно да го реши овој проблем, сè додека институциите молчат, а криминалот се толерира“, порачуваат од здружението, додавајќи дека одговорноста овојпат мора да има име и презиме.
