Селото Костурино вчера попладне беше погодено од вистинска природна катастрофа. Надојдената река Тркања, со бескрупулозна сила, за само неколку минути ја поплави шталата на Зоран и Никола Колеви и однесе 120 јагниња и 100 овци.
„Водата се креваше над два метра и едноставно нè блокираше. Не можевме да ја отвориме шталата и да ги спасиме животните,“ раскажува потресен Зоран Колев. Според него, опасноста за нив самите била огромна, но успеале да се извлечат од водниот вихор без последици.
Штетата, вели, е огромна. Најпрво пријавил во Општина Струмица, а загинувањето на животните веќе е пријавено и кај другите надлежни служби кои треба да излезат на терен и да проценат колку е голема материјалната загуба.
