Москва се соочува со снежен удар каков што ретко се памети – денеска снежната покривка достигна 61 сантиметар, надминувајќи го досегашниот рекорд од 1994 година, кој исто така изнесуваше 61 сантиметар.
Водечки метеоролошки експерт од центарот „Фобос“, Евгениј Тишковец, потврдува дека снежниот метеж не стивнува. „На референтната станица ВДНХ, во последните 24 часа снежната покривка порасна за три сантиметри, достигнувајќи ги рекордните 61 сантиметар“, изјави Тишковец за „РИА Новости“.
Ситуацијата е уште поекстремна во некои делови на градот. Во централниот реон Балчуг висината на снегот достигна 69 сантиметри, додека во северниот дел, Тушино, се измерени 63 сантиметри. Московската област исто така е тешко погодена: во Черусти снежната покривка достигна 68 сантиметри, а во Серпухов 66 сантиметри.
