Интерпол објави црвена потерница за Милош Меденица, син на поранешната претседателка на Врховниот суд на Црна Гора, Весна Меденица, откако беше осуден на 10 години и два месеца затвор за создавање криминална организација. Потерницата е јавно објавена на официјалната веб-страница на Интерпол, на барање на Управата на црногорската полиција.
Како што соопштија надлежните, Генералниот секретаријат на Интерпол во Лион издал јавна меѓународна потерница за 39-годишниот црногорски државјанин, роден во Колашин. Потерницата е распишана врз основа на наредба на Вишиот суд во Подгорица и со согласност на Министерството за правда на Црна Гора.
Од Управата на полицијата информираат дека Канцеларијата на Интерпол во Подгорица ја иницирала меѓународната потерница во четврток, откако судската наредба и согласноста од Министерството за правда биле доставени истиот ден.
По изрекувањето на пресудата, полицијата не го пронашла Меденица на неговата пријавена адреса на живеење. Освен него, Вишиот суд во Подгорица на иста казна од по 10 години затвор ја осуди и неговата мајка, поранешната претседателка на Врховниот суд Весна Меденица, како член на организирана криминална група.
