Прекин во работата на жичницата на планината Улудаг, во близина на турскиот град Бурса, денеска остави 51 лице заглавени во кабините за време на превозот, пренесе државната телевизија ТРТ Хабер.
Инцидентот се случил околу 11 часот по локално време во областа Османгази, позната по хотелите и капацитетите за зимски туризам. Поради технички дефект, патниците останале блокирани неколку метри над земјата.
По пријавата на бројот за итни случаи 112, на терен биле испратени 96 спасувачи, меѓу кои припадници на жандармеријата, медицински тимови, пожарникари и екипи од Дирекцијата за управување со катастрофи и вонредни состојби, а во акцијата се вклучиле и тимови од соседниот округ Сакарија. По координирана интервенција, сите 51 лице биле безбедно евакуирани.
Турскиот министер за внатрешни работи, Али Јерликаја, им честиташе на спасувачките тимови за успешната и навремена акција. Надлежните институции започнаа истрага за утврдување на причините за дефектот.
Жичницата во Бурса, која е во употреба од 1963 година и целосно реконструирана во 2015 година, е долга девет километри и е една од најдолгите во светот, како и една од најпосетуваните туристички атракции во регионот.
