Интензивно продолжуваат активностите за расчистување на брегот на езерото Младост. Во изминативе денови, со механизација на Водостопанство и ЈПВ „Лисиче“, се спроведува чистење на брегот од страната на регионалниот пат.
Доколку дозволат временските услови, планираното чистење до локацијата кај бродот „Панини“ се очекува да заврши до почетокот на идната недела. Потоа ќе следи собирање на биомасата – трска, тиња и гранки – по што ќе се донесе тампон и ќе се постеле брегот, со цел да се спречи повторно таложење на органски материи.
Од надлежните упатуваат јавна благодарност до сите кои учествуваат во процесот, а особено до општествено одговорните компании кои со сопствени средства и ресурси овозможуваат непречено одвивање на активностите.
Воедно, се упатува апел до останатите правни и физички лица кои функционираат покрај езерото да се вклучат во акцијата, која значи заштита и зачувување на езерото Младост, но и одржлив и стабилен прилив во иднина за градот и за самите корисници.
Во наредните денови се очекува и отпочнување со работа на фирмите кои преку бушотини ќе обезбедат дотур на свежа вода во езерото. Одговорните потенцираат дека фокусот не е на барање виновници во минатото, туку на заедничко градење решенија за иднината, со порака дека Велес може да напредува само со единство и заеднички ангажман.
