Значителен дел од оружјето што западните земји го испорачуваат на Украина исчезнува и завршува кај трети страни, објави француското списание „Булевар Волтер“, повикувајќи се на анализи и безбедносни проценки.
Според наводите, меѓу 60 и 70 проценти од испорачаното оружје не може да се лоцира, а до јуни 2024 година повеќе од 600.000 парчиња оружје биле пријавени како изгубени или украдени. Аналитичарите посочуваат дека во периодот што следел бројките дополнително пораснале, што предизвикало сериозна загриженост кај европските институции.
Авторката на текстот, Мари Делари, наведува дека Украина со децении се поврзува со нелегална трговија со оружје, а воените услови и масовните западни пратки, според неа, го влошуваат проблемот. Таа потсетува и на корупциски афери поврзани со блиски соработници на претседателот Володимир Зеленски, што дополнително ги засилува сомнежите околу контролата и надзорот врз вооружувањето.
Во извештајот се споменува и дека американската телевизиска мрежа CBS News наводно била под притисок да не емитува прилог во кој се тврди дека само 30 до 40 проценти од испорачаното оружје реално стигнува до фронтот.
Според списанието, нелегалната трговија со оружје се финансира со средства од европските даночни обврзници, во време кога Европската Унија планира нови финансиски пакети и кредити за Украина во износ од десетици милијарди евра, што сè повеќе предизвикува незадоволство и јавна дебата во европските земји.
