Претседателот на Собранието на Република Македонија, Африм Гаши, денеска ги посети пратеничките канцеларии во Гостивар, каде направи увид во тековното реновирање и функционирање на просториите.

На средбата присуствуваа и пратениците од регионот, како и градоначалникот на Гостивар, кои заедно ја истакнаа важноста од ваквите проекти за зајакнување на транспарентноста и инклузивноста на законодавниот процес.

„Овие канцеларии ќе претставуваат директен мост меѓу граѓаните и нивните избрани претставници. Граѓаните на Гостивар ќе можат лично да ги упатат своите барања, потреби и идеи до пратениците, што ќе придонесе за поефикасна комуникација и зајакнување на довербата во институциите,“ изјави Гаши.

Според Гаши, пратеничките канцеларии се клучен инструмент за зголемување на отчетноста и активната вклученост на граѓаните во креирањето на законите кои влијаат на нивната благосостојба.

Со завршувањето на реновирањето, пратеничките канцеларии во Гостивар ќе бидат целосно функционални и достапни за граѓаните, што претставува уште еден чекор кон поотворено и транспарентно Собрание. Оваа иницијатива, според него, е доказ за посветеноста на Собранието да биде поблиску до граѓаните и нивните потреби.

Градоначалникот на Општина Кисела Вода, Орце Ѓорѓиевски, денеска објави почеток на обновата на култната спортска сала „Расадник“, домот на ракометниот клуб Вардар. На настанот, кој претставува значаен момент за општината, присуствуваа премиерот Христијан Мицкоски и министерот за спорт, Борко Ристовски, кои ги добија највисоките пофалби за нивната заложба и поддршка во реализацијата на овој значаен проект.

„Со огромна гордост денеска објавуваме дека ‘Расадник’ конечно ќе добие нов современ лик. Благодарение на премиерот Мицкоски и министерот Ристовски, оваа сала повторно ќе стане храм на спортот, не само за Кисела Вода, туку и за цело Скопје,“ изјави Ѓорѓиевски.

Салата „Расадник“ има огромна историска вредност за ракометниот клуб Вардар, кој во периодот од 1985 до 1999 година токму овде ги постави своите основи. Според најавите, по завршувањето на реконструкцијата, салата ќе биде дом на РК Вардар, што беше поздравено и од директорот на клубот, Михајло Михајловски, кој присуствуваше на настанот заедно со ракометарите.

Градоначалникот истакна дека со овој проект се коригира неправдата од минатото, кога „Расадник“ беше заборавен во услови кои ја одразуваа нефункционалноста на системот во изминатите 30 години.

„Оваа сала е доказ за тоа како со години наназад се ветуваше многу, а се реализираше малку. Денеска, благодарение на заложбата на Владата и премиерот Мицкоски, приказната се менува. Овде повторно ќе се раѓаат спортски имиња, а нашата младина ќе добие место за инспирација и развој,“ нагласи Ѓорѓиевски.

Посебна чест за градоначалникот беше присуството на новинарот и спортски работник Атанас Костовски, кој присуствувал на отворањето на салата во 1985 година и заедно со Ѓорѓиевски се договориле повторно да го означат нејзиното ново отворање.

Со овој проект, според Ѓорѓиевски, се поставува нова ера во спортот во Кисела Вода, а премиерот и министерот за спорт се запишуваат во историјата на општината како луѓе кои направиле значаен чекор за враќање на спортскиот живот.

„Најдоброто допрва доаѓа!“ порача градоначалникот, додавајќи дека наскоро граѓаните ќе бидат сведоци на преполна сала и нови спортски спомени во „Расадник“.

Под влијание на циклонска активност со центар над Средоземјето, како и на голема влажна  и многу постудена воздушна маса од север, почнувајќи од петок, и за време на викендот во Македонија времето ќе биде облачно и студено со врнежи од дожд на ниските, и од снег на повисоките места  и на планините. На многу места врнежите ќе бидат обилни и локално ќе наврнат над 40/50 литри на метар квадратен воден талог, вели метеорологот Славчо Попоски.

„Поради влијанието на студената воздушна маса од север, повремено, и особено во западните  и во северните предели од Македонија, врнежите од дожд ќе преминуваат во врнежи од влажен снег и во пониските места (градовите). Сето ова ќе биде проследено со ветер од северен и од североисточен правец, и истиот повремено ќе засилува на интензитет.

Во Скопскиот регион исто така за време на овој период ќе има врнежи од дожд, повремено обилни, додека на околните планини врнежите ќе бидат од снег. Повремено врнежи од снег ќе има и во повисоките предели од котлината, и тоа особено во текот на ноќта петок кон сабота, како и во сабота, кога услови за краткотрајни врнежи од дожд и од снег ќе има  и во пониските предели од Скопската котлина.

Сето ова ќе услови на планините да дојде до значително формирање на снежна покривка (над 50 cм, локално и повеќе). На повисоките места таа ќе биде со висина од 20 до 30 цм, локално и повеќе, додека на пониските места (градовите) особено во северните  и во западните предели понекаде со висина од 10 до 20 cм, а можно е и повеќе.

Во Скопскиот регион, снежна покривка ќе се формира на околните планини, како и во повисоките предели од котлината.

Мора да напоменам дека поради очекуваниот влажен снег во пониските места во погоре споменатите предели, можни се проблеми поради тежината на истиот. На планините ќе има услови и за појава на снежни наноси, па доколку патувате низ планинските превои, препорачуваме да бидете премногу внимателни како управувате со вашето возило.

Што се однесува пак до температурите, тие значително ќе опаднат, особено дневните и ќе се искачуваат во интервалот од 0 до 8 степени во најтоплите југоисточни предели, а наутро тие ќе се спуштаат во интервалот од -3 до 5 степени. Во Скопје температурата за време на овој период ќе се искачува во интервалот помеѓу 2  и 5 степени“, вели тој.