Премиерот Христијан Мицкоски јасно стави до знаење дека обвинителката Ленче Ристоска не е кандидат што Владата го разгледува за функцијата државен јавен обвинител. Во изјава дадена за Канал 5, тој нагласи дека нејзиното име „апсолутно не е во игра“.
Изјавата доаѓа во период кога постапката за избор на нов шеф на Јавното обвинителство влегува во клучна фаза. Советот на јавни обвинители веќе ѝ доставил на Владата позитивно мислење за четворица од вкупно пет пријавени кандидати, но, според премиерот, записникот сè уште не е формално пристигнат.
Мицкоски посочи дека конечниот став ќе биде соопштен откако Владата ќе ги разгледа официјалните документи. „Не можам да изнесувам лични ставови без увид во записникот“, рече тој, потенцирајќи дека од четирите имиња што добиле поддршка од Советот, три остануваат опција.
Ристоска моментално работи како обвинителка во ОЈО Скопје, а претходно беше дел од Специјално јавно обвинителство. Таа и натаму застапува предмети поврзани со поранешни функционери на ВМРО-ДПМНЕ.
На почетокот на месецот, обвинителката јавно изрази очекување дека ќе ја добие функцијата, наведувајќи дека се пријавила затоа што верува дека може да понуди професионален квалитет, а не за да предизвикува политички тензии.
