Словачкиот премиер Роберт Фицо предупреди дека ќе го прекине снабдувањето со електрична енергија за Украина доколку Киев не преземе чекори за да се продолжи испораката на руска нафта за Словачка, која е блокирана речиси еден месец. Испораката преку нафтоводот „Дружба“ е клучна за Словачка и Унгарија, единствените две земји од ЕУ кои сè уште се потпираат на руска нафта.
„Словачка е суверена земја и нема да ги перципира односите со Украина како еднонасочен билет корисен само за нив“, напиша Фицо на својата Фејсбук-страница. Тој посочи дека само прекинот на испораките на гас предизвикал штета од 500 милиони евра, додека прекинот на транзитот на нафта предизвикал уште поголеми економски и логистички последици.
Украина предложи алтернативни рути за испорака на нафта, вклучително и преку украинскиот систем за транспорт или морски патишта, додека траат итните поправки на нафтоводот. Мисијата на Украина во ЕУ истакна дека земјата е подготвена да обезбеди транспорт на нафта во рамките на законската регулатива.
Ситуацијата е дополнително комплицирана од Унгарија, која вчера се закани да го блокира вонредниот заем од 90 милијарди евра од ЕУ за Украина, обвинувајќи ја Киев за „уцена“ со цел политички да влијае на изборите во земјата. Унгарскиот министер за надворешни работи, Петер Сијарто, тврди дека прекинот на снабдувањето е дел од координирани обиди да се зголемат цените на горивата пред изборите.
Фицо додаде дека одлуката Словачка да не се приклучи кон воениот заем за Украина е оправдана, имајќи предвид неприфатливиот став на украинскиот претседател Володимир Зеленски кон словачките интереси.
