Состојбата во езерото Младост кај Велес повторно алармира: неколку дена по тоа што градоначалникот на општината, Марко Колев, се пофали на социјалните мрежи дека акумулацијата е исчистена и дека ревитализацијата дава резултати, водата повторно е покриена со мртва растителна маса која плови на површината.
Најизразено е на заливот, каде што Отовичка Река се влива во езерото. Таму густата биомаса се шири, а мирисот на фекалии е неподнослив, при што се забележуваат отворени канализациони цевки во речното корито, како што известуваат извори за Дума.мк.
Последните анализи на Центарот за јавно здравје во Велес потврдуваат дека микробиолошкиот квалитет на водата останува лош. Иако водата не смее да се користи за капење, полевање или рекреација, се уште не е испитано дали има цијанотоксини – и покрај тоа што ова предупредување трае веќе една година. За споредба, лабораторија во Белград би наплатила 110 евра за вакво испитување.
Наскоро објавениот извештај на Хидробиолошкиот завод од Охрид, по нарачка на ЈПВ „Лисиче“, исто така алармира дека водата во Младост е со „лош квалитет“, со четврта и петта класа според микробиолошките индикатори. Присуството на колиформни бактерии и фекално загадување укажува на сериозни проблеми со системот за одведување на отпадни води. Покрај тоа, езерото е контаминирано со амонијак и други токсични материи, а најдлабоките слоеви на акумулацијата, на 13 метри длабочина, се без растворен кислород – што создава закана по растителниот и животинскиот свет.
Физичко-хемиските анализи покажуваат високи концентрации на органски материи и нутриенти (вкупен азот и фосфор), што укажува на интензивна еутрофикација на езерото. Антропогено влијание, сушни периоди и високите температури само ја влошуваат ситуацијата, доведувајќи до намалување на водното ниво и до создавање услови за ширење на фекална и органска контаминација.
Причинителот на загадувањето, според извештаите на Државниот инспекторат за животна средина и на ЈКП „Дервен“, е колекторскиот систем во населбата Отовица. Десната страна на населбата е приклучена на колекторот, но левата страна не е целосно поврзана поради висинските разлики, а дел од објектите користат септички јами или можеби директно испуштаат отпадни води во реката. Иако правните субјекти како ресторани и хотели не го загадуваат езерото, дел од отпадните води од неприклучени куќи и септички јами сепак завршуваат во Младост.
Во склоп на активностите за ревитализација, ЈП „Лисиче“ изврши чистење на крајбрежјето од седимент, сува трска и наслаги. Следната недела се очекува јавен повик за изведба на бушотини за подобрување на квалитетот на водата, а се работи и на проект за санација на темелниот испуст на акумулацијата.
