Организацијата ОМО Илинден – Пирин изрази јавна поддршка за адвокатот Тони Менкиноски, оценувајќи дека забраната која му е изречена нема правна основа, туку претставува етнички мотивирана одлука.
Од организацијата наведуваат дека ваквата постапка, според нив, е насочена против Менкиноски поради неговата припадност и ангажман во одбрана на правата на Македонците во Бугарија.
„Забраната против адвокатот Тони Менкиноски не е со правна позадина – таа е етничка, само затоа што е Македонец. Ова е срамна постапка што ја разоткрива вистинската природа на шовинизмот кој владее во одредени кругови во Бугарија“, наведуваат од ОМО Илинден – Пирин.
Според нив, Менкиноски со својата работа пред Европски суд за човекови права ја симболизира борбата за правда, достоинство и заштита на основните човекови права на Македонците во Бугарија.
Во реакцијата се истакнува дека македонската заедница нема да се откаже од борбата за своите основни права и слободи, додавајќи дека ваквите случаи треба да бидат предмет на внимание и на институциите на Европска Унија.
Од ОМО Илинден – Пирин порачуваат дека Европската Унија не треба да остане рамнодушна кон, како што велат, политиките кои имаат за цел преку притисоци и закани да го негираат македонскиот идентитет.
…
