Српската влада донесе одлука која веднаш предизвика реакции на домашниот и регионалниот пазар: забрана за извоз на нафта и нафтени деривати наменети за моторни возила, вклучувајќи дизел, бензин и сурова нафта. Мерката е привремена и важи до 19 март, а по таа дата ќе се разгледуваат понатамошни чекори, соопшти министерката за рударство и енергетика, Дубравка Ѓедовиќ Хандановиќ.
„Целта е да се заштити домашниот пазар од недостиг и нагли поскапувања, кои се резултат на глобалните потреси на енергетските пазари“, истакна министерката. Таа додаде дека Србија веќе обезбедува нафтени деривати за граѓаните по цени под реалната берзанска вредност и дека државата продолжува со активности за заштита на економијата и стандардот на граѓаните.
Причината за ваква одлука се силните тензии на меѓународните енергетски пазари, кои се продлабочија поради ескалацијата на конфликтот на Блискиот Исток. Новите воени операции меѓу Израел, САД и Иран, започнати кон крајот на февруари, ја зголемија неизвесноста околу стабилноста на испораките на нафта и течен природен гас од регионот.
Особено чувствителна е пловидбата низ Ормутскиот теснец, клучен за светскиот транспорт на нафта и течен гас. Секоја блокада или нарушување на сообраќајот веднаш се рефлектира на цените на енергенсите на глобалните берзи. Како последица, цената на „Брент“ суровата нафта надмина 110 долари за барел во Европа, додека во Азија достигна околу 120 долари.
Се очекува итен состанок на земјите од Г7 и Меѓународната агенција за енергија, на кој ќе се разгледаат можности за стабилизирање на глобалниот енергетски пазар. Во вакви услови на неизвесност, одлуката на Србија да го ограничи извозот претставува стратегиски потег за одржување на ценовната и снабдувачката стабилност на домашниот пазар.
