Унгарскиот министер за надворешни работи и трговија, Петер Сијарто, денеска излезе со остро предупредување поради нападот на украинските сили врз гасоводот Туркстрим во Русија. Според него, ова претставува директна закана за енергетската сигурност на Унгарија и потенцијално за целиот регион.
„Туркстрим е клучен за снабдувањето на Унгарија со природен гас. Без него, нашата земја не може физички да гарантира стабилно снабдување,“ напиша Сијарто на X, нагласувајќи дека оваа акција се надоврзува на претходните блокади на нафтоводот Дружба, кои исто така влијаеле на енергетската автономија на земјата.
Гасоводот Туркстрим, кој минува од Русија низ Црното Море до Турција, а потоа преку Бугарија и Србија кон Балканот, денеска е критична артерија за снабдување со енергија во југоисточна Европа. По 2022 година, Русија го пренасочи протокот кон југ и значително го намали транзитот преку Украина, што го зголеми значењето на Туркстрим за земјите на Балканот.
На пример, Македонија добива 0,3–0,4 милијарди кубни метри гас годишно преку Туркстрим и сеуште нема доволни алтернативи како LNG од Грција или азербејџански гас за целосна замена. Прекинот би имал сериозни последици за индустријата, греењето и електропроизводството. Србија, со 2–3 милијарди кубни метри годишно, и Босна и Херцеговина, кои зависат од гасот преку Србија, исто така се ранливи. Дури и Бугарија, која има пристап до азербејџански гас и LNG, значителен дел од снабдувањето го обезбедува преку Туркстрим.
Сијарто изјави дека за Унгарија, и индиректно за Балканот, било каков напад врз Туркстрим е неприфатлив и се смета за закана за националната безбедност.
Протокот на гас засега е непрекинат, но секој нов удар би можел да предизвика сериозни прекини во снабдувањето, со директни последици за Македонија и соседните земји.
