Еден француски војник го загуби животот во Ирак во напад врз силите на Франција, соопшти денеска претседателот Емануел Макрон. Инцидентот се случил во регионот Ербил, каде француските војници учествуваат во меѓународната мисија за борба против екстремистичката организација „Исламска држава“.
Во објавата на својот профил на социјалната мрежа „Икс“, Макрон го осуди нападот како „неприфатлив“ и нагласи дека француското присуство во Ирак е целосно посветено на борбата против тероризмот. Тој додаде дека конфликтите во Иран не можат да оправдаат вакви насилни акции, но не го идентификува сторителот.
Според соопштението на француското Министерство за одбрана, во нападот со дрон биле повредени уште шест француски војници додека вршеле обука на ирачките сили. Повредените биле префрлени во најблиската болница за итна нега.
Локалните власти од Ербил наведуваат дека нападот бил изведен со два дрона и бил насочен кон воена база околу 40 километри југозападно од главниот град на Курдистанската автономна област. И натаму не е познато кој стои зад акцијата.
Нападот се случува во време на растечки тензии на Блискиот Исток, откако неодамнешните операции на САД и Израел против Иран предизвикаа ответни удари врз американски бази во регионот. Францускиот контингент во Ербил брои стотици војници, кои делуваат како дел од пошироката коалиција за борба против милитантите на Исламската држава.
