Млада девојка од Тетово се здобила со тешки телесни повреди откако паднала од балкон на станбена зграда во градот. Инцидентот се случил синоќа околу 18:40 часот, а случајот веднаш бил пријавен во полиција.
Според информациите од СВР Тетово, настанот бил пријавен од екипите на Итната медицинска помош, кои први пристигнале на местото и констатирале дека женско лице паднало од балкон.
Поради сериозноста на повредите, 20-годишната девојка била итно транспортирана на понатамошно лекување во Клиничкиот центар „Мајка Тереза“ во Скопје, каде лекарите се борат за нејзината здравствена состојба.
Полицијата извршила увид на местото на несреќата, а истрагата се спроведува по наредба на јавен обвинител. Засега не се соопштуваат дополнителни детали за околностите под кои дошло до падот.
Надлежните институции работат на целосно расчистување на случајот, по што се очекуваат повеќе информации за тоа како дошло до овој сериозен инцидент.
