Електронските услуги на државните институции во Македонија сѐ уште се далеку од масовна употреба, покажуваат најновите податоци на Евростат за 2025 година. Само околу една третина од граѓаните на возраст од 16 до 74 години, 32,32 проценти, се обраќале кон веб-страници или апликации на јавни институции, што значително ја става земјата под просекот на Европската Унија.
Најпопуларните дигитални услуги се сосема практични: 17,11 проценти од граѓаните користеле платформи за преземање или печатење официјални обрасци, 15,44 проценти барале официјални документи или сертификати, 12,94 проценти имале пристап до јавни бази на податоци или регистри, додека 10,96 проценти проверувале свои лични информации.
Во споредба со соседните држави, Македонија заостанува. Грција е лидер во регионот со 71,99 проценти, следува Хрватска со 65,68 проценти и Србија со 64,23 проценти. Подоцна следат Црна Гора со 52,39 проценти, Босна и Херцеговина со 37,87 проценти и Бугарија со 35,95 проценти. За Албанија и Косово нема достапни податоци.
Министерот за дигитална трансформација, Стефан Андоновски, истакна дека Порталот за услуги бележи забележителен раст и постепено се трансформира во главна платформа за електронски услуги. Во 2025 година, бројот на издадени услуги пораснал за 290 проценти, а бројот на корисници се зголемил за 166 проценти, што го покажува потенцијалот на дигитализацијата во земјата.
На европско ниво, 71,9 проценти од граѓаните користеле е-услуги, што е раст од 1,9 процентни поени во споредба со 2024 година. Највисоко ниво на дигитална активност е забележано во Данска (98 проценти), Холандија (96,2 проценти), Финска (96,1 проценти) и Шведска (96 проценти), додека најниско е во Романија (24,1 проценти), како и во Бугарија и Италија.
Европските граѓани најчесто ги користеле електронските услуги за да добијат информации за јавни услуги, закони и бенефиции, како и за пристап до лични податоци и поднесување даночни пријави, што ја прави дигиталната комуникација со институциите сѐ повеќе неопходна во секојдневниот живот.
