Гасните капацитети во Абу Даби се привремено затворени поради ракетен напад, соопштија властите на Обединетите Арапски Емирати. Инцидентот се случил откако остатоци од пресретната ракета погодиле инфраструктурата на комплексите Хабшан и полето Баб.
„Сите гасни капацитети се привремено затворени, но засега нема пријавено штети“, истакна владата, без да прецизира детали за степенот или видот на евентуалните последици.
Не е познато колку долго ќе трае прекинот на работењето на овие критични објекти. Исто така, во официјалното соопштение објавено на социјалната мрежа Х не се наведува кој стои зад нападот.
Нападот се случува во време кога Иран, според извештаите, продолжува да изведува напади врз локации во Емиратите, во контекст на ескалираната војна на Блискиот Исток која трае веќе повеќе од две и пол недели.
