Министерот за здравство Азир Алиу денеска на прес-конференција откри дека лекар вработен во јавното здравство добил месечна исплата од 700 илјади денари, но не откри детали за неговиот идентитет ниту за установата во која работи.
Тој посочи дека институциите се веќе запознаени со случајот и најави дека ќе се постапува институционално, без да се загрози системот. Не ја исклучи можноста за кривична одговорност, доколку се утврдат неправилности.
Алиу најави воведување на систем за евиденција на присуство на работа со отпечаток од прст, кој веќе се тестира во две клиники во Скопје, а потоа ќе се прошири и во останатите здравствени установи. Целта е подобра контрола на работните обврски и поефикасно функционирање на системот.
Министерот укажа на големи разлики во ангажманот на лекарите, наведувајќи дека некои прегледуваат само еден пациент неделно, додека други достигнуваат и до 100 пациенти. Дополнително, информира дека во седум клиники е утврдено дека дополнителната дејност се извршувала над дозволеното, односно до 41 процент, иако законскиот максимум е 20 проценти.
Како пример за нерамномерност, Алиу посочи дека двајца специјалисти од иста област имале значителна разлика во бројот на операции – едниот извршил 1.134, а другиот 470, додека во внатрешноста имало лекари кои во текот на 2025 година не извршиле ниту една операција.
Исто така, биле забележани разлики и кај реализираните упати – еден лекар имал над 16.500 во период од шест месеци, додека друг нешто над 7.300, што отвора сомнежи за функционирањето на системот.
Министерството ќе побара и податоци за ангажманот на лекарите во приватните здравствени установи, со цел да се утврди колку време поминуваат надвор од јавниот сектор.
Премиерот Христијан Мицкоски претходно изјави дека постојат случаи каде што лекари преку дежурства и додатоци достигнувале месечни примања од околу 10 илјади евра, што дополнително ја отвора дебатата за потребата од реформи во здравствениот систем.
…
