Ноќеска стапува на сила летното сметање на времето, со што часовниците ќе се поместат еден час нанапред – од два на три часот. Со ова официјално завршува зимскиот временски режим и започнува периодот со подолги денови и повеќе природна светлина.
Согласно уредбата за 2026 година, летното сметање на времето започнува на 29 март и ќе трае до 25 октомври, кога часовниците повторно ќе се вратат еден час наназад.
Оваа промена традиционално се воведува со цел подобро искористување на дневната светлина и намалување на потрошувачката на електрична енергија. Сепак, експертите предупредуваат дека поместувањето на часовникот може привремено да влијае врз биоритамот, предизвикувајќи замор, нарушен сон и намалена концентрација, особено во првите денови по промената.
Практиката на сезонско поместување на времето е усогласена на ниво на Европската Унија уште од 1996 година. И покрај иницијативата од 2018 година за негово укинување, земјите членки сè уште немаат постигнато заедничка одлука, па оваа практика продолжува да се применува.
