Во пресрет на Велигден, кога трпезите традиционално се полнат со јајца, месо и разновидни прехранбени производи, надлежните институции го засилуваат надзорот врз пазарот. Агенцијата за храна и ветеринарство започна интензивна акција на контроли низ целата земја, со цел да спречи појава на небезбедна храна и да ја сузбие нелегалната трговија која често се зголемува во овој период.
Под надзор се ставени сите фази од синџирот, од производство и преработка, до транспорт и продажба. Инспекторите и официјалните ветеринари се постојано на терен, каде детално проверуваат дали компаниите и продавачите ги почитуваат пропишаните стандарди за безбедност. Особено внимание се посветува на јајцата и боите за нивно декорирање – не само во однос на правилното складирање и означување, туку и при увозот. Секоја пратка што пристигнува во земјава поминува низ задолжителен физички преглед уште на местото на истовар.
Засилените контроли ги опфаќаат маркетите, рестораните, специјализираните продавници, месарниците, зелените пазари, како и увозниците и производителите на бои за јајца. Целта е граѓаните да добијат сигурни, проверени и квалитетни производи за празничната трпеза.
Од Агенцијата апелираат до потрошувачите да бидат внимателни при купувањето и да избираат исклучиво регистрирани и одобрени продавачи, кои се под редовен инспекциски надзор. Само така, велат, може да се гарантира безбедноста на храната што ќе се најде на велигденската трпеза.
