Се очекува до крајот на годината да се стави точка на долгогодишната изградба на автопатот Кичево-Охрид, а неговата цена дефинитивно изнесува околу 760-770 милиони евра, со просечна вредност од 13,5 милиони евра за еден километар. Ова го истакна заменик-претседателот на Владата и министер за транспорт, Александар Николоски, во гостувањето на „Топ Тема“ на ТВ Телма.
„Градежните активности треба да завршат до крајот на годинава, а употребната дозвола се очекува заклучно со мај“, нагласи Николоски, посочувајќи дека досега голем дел од патиштата во земјава немале такви дозволи. Тој додаде дека делницата Кичево-Охрид е најевтината од сите автопати кои се градат во Македонија.
Финансирањето за завршување на автопатот сега ќе се обезбеди преку домашни банки, откако претходната поддршка од кинеската Ексим банка е прекината. Премиерот Христијан Мицкоски посочи дека Владата успешно се снајде, благодарение на координацијата помеѓу Министерството за транспорт, ЈП за државни патишта и кабинетот на потпретседателот Николоски. „Се обезбеди доволна сума за завршување на проектот и за пуштање во употреба“, рече Мицкоски.
Според ЈПДП, прекинот на финансирањето од Ексим банка се случил бидејќи претходната Влада, по вториот заем, известила дека идното финансирање ќе биде директно од Република Македонија, што го отвори патот за домашни извори на средства.
