Два американски авиони од типот HC-130J „Combat King II“ полетаа од Штутгарт, Германија, и се упатија кон Блискиот Исток, што укажува дека потрагата по исчезнатиот член на екипажот на борбениот авион F-15E сè уште не е прекината.
Станува збор за специјализирани летала за борбено пребарување и спасување, чија клучна улога е дополнување гориво во воздух на хеликоптери од типот „Pave Hawk“, со што значително се продолжува нивниот дострел и можност за извлекување на лица длабоко во непријателска територија.
И покрај тоа што повеќе извори претходно објавија дека потрагата е завршена и дека исчезнатиот член на екипажот се смета за загинат, најновото распоредување на овие авиони сугерира спротивно.
Воени аналитичари оценуваат дека вакви капацитети не се испраќаат за операции кои се веќе затворени, што дополнително ја поткрепува тезата дека спасувачката мисија е активна.
Ова претставува втор бран на воени летала кои во последните 24 часа се префрлаат од Европа кон Блискиот Исток, што укажува на зголемена воена активност и можни нови операции во регионот.
