Зоолошката градина во Битола добива нов развоен импулс, со најавени проекти за подобрување на условите за животните и збогатување на животинскиот фонд, што треба дополнително да ја зголеми нејзината атрактивност, особено во пресрет на пролетно-летната сезона кога интересот на посетителите е најголем.
Градоначалникот на Битола, Тони Коњановски, ја посети градината каде се планира реализација на два значајни проекта – изградба на нов терариум и објект за копитари, кои се поддржани од Министерството за култура и туризам, а се аплицирани од Општина Битола во рамки на вториот владин повик.
Директорот на зоолошката градина, Жарко Тренковски, информираше за тековните активности и динамиката на реализација, нагласувајќи дека станува збор за инвестиции кои директно ќе влијаат врз подобрување на благосостојбата на животните.
Паралелно со инфраструктурните зафати, во тек е и интензивно пролетно уредување на просторот, со акцент на оплеменување на живеалиштата, со што зоолошката градина станува уште попривлечна за посетителите, особено за најмладите кои се нејзини најчести гости. Зоолошката градина во Битола важи за единствена во регионот и редовно привлекува ученици не само од градот, туку и од други делови на државата, па дури и од соседна Грција.
Во наредниот период се очекува и значително збогатување на животинскиот свет. Веќе денеска треба да пристигнат нови животни од Зоолошката градина во Скопје, меѓу кои мајмуни од видот патас, лемури и коати. Дополнително, во текот на април или мај, преку меморандум за соработка со зоолошката градина во Белград, како подарок се најавени и нови животни, меѓу кои бизон, антилопи, коати, свети ибис, сервал и буву буву, што ќе ја збогати понудата и ќе донесе ново искуство за посетителите.
Покрај инвестициите во инфраструктурата и животинскиот фонд, оваа година е планирана и едукација на вработените во зоолошката градина во Загреб, што треба да придонесе за подигнување на стандардите и професионалниот капацитет на установата.
Со овие активности, Општина Битола испраќа јасна порака дека вложувањето во зоолошката градина не е само инвестиција во туризмот, туку и во едукацијата, екологијата и квалитетот на живот во градот.
…
