Царинската управа на аеродромот во Скопје, минатата недела спречи обид за криумчарење на голема количина стока, откривајќи 1.463 парчиња титаниумски пирсинг.
При рутинска контрола, службениците не само што го открија пирсингот, туку и опрема за тетовирање, вклучувајќи 32 ножици и 70 игли, која според законските регулативи бара посебни дозволи за увоз. Без соодветна документација, ваквите материјали не можат легално да влезат во земјата.
Лицето кое се обидело да ја внесе стоката е државјанин на Шпанија, кој пристигнал од Стокхолм со конечна дестинација Кипар. Непријавената стока веднаш била запленета, а против сторителот е покрената прекршочна постапка.
Надлежните истакнуваат дека продолжуваат со истрагата за да се утврдат сите околности околу обидот за нелегален транспорт, нагласувајќи ја важноста на строгите контроли на аеродромите, особено кога станува збор за производи кои подлежат на посебни дозволи.
