Кина најави подготвеност да им понуди поддршка на африканските држави во ублажување на економските последици од глобалните тензии поврзани со конфликтот меѓу САД и Израел од една страна и Иран од друга, порача кинескиот претседател Си Џинпинг во Пекинг.
Во разговорите со претседателот на Мозамбик, Даниел Чапе, кој е првиот африкански лидер што ја посети Кина по ескалацијата на кризата, Си предупреди дека последиците од нестабилноста веќе се чувствуваат на африканскиот континент. Според него, најголем удар трпат земјите кои во голема мера зависат од увоз на енергенси, храна и ѓубрива, а дополнителен притисок создаваат и нарушувањата во глобалните трговски текови, особено преку Ормутскиот теснец.
„Глобалниот југ, во кој Кина и Африка имаат клучна улога, отсекогаш претставувал глас на правдата во свет исполнет со нестабилност. Заедно сме подготвени да одговориме на предизвиците, да го поттикнеме мирот и да придонесеме кон развој“, изјави Си.
Средбата во Пекинг се случува во период на засилена дипломатска активност на кинеското раководство, непосредно пред најавената посета на американскиот претседател Доналд Трамп во мај, што дополнително ја зголемува политичката тежина на разговорите.
Паралелно со дипломатските иницијативи, Пекинг продолжува да ја зацврстува економската присутност во Африка, воведувајќи режим на нулта царина за увоз од 53 африкански држави, кој треба да започне да се применува од 1 мај.
Во истиот геополитички контекст се продлабочуваат и тензиите околу Тајван. Властите во Тајпеј соопштија дека претседателот Лаи Чинг-те бил принуден да откаже планирана посета на Африка откако неколку држави ги повлекле дозволите за прелет на неговиот авион, што тие го поврзуваат со притисок од Пекинг. Кина, од своја страна, им се заблагодари на тие земји, истакнувајќи дека постапиле во согласност со принципот „една Кина“.
…
