Европа се наоѓа пред сериозен енергетски и авијациски притисок, откако, според предупредувања објавени од Sky News, нарушувањата во глобалните енергетски текови поврзани со конфликтот во Иран предизвикале силен раст на цените и неизвесност околу снабдувањето со авионско гориво.
Европската унија укажува дека ситуацијата засега повеќе се чувствува како ценовен шок отколку како директен недостиг, но официјалните лица не исклучуваат сценарио во кое кризата би можела да се продлабочи и да доведе до реални проблеми во снабдувањето на авиогориво. Европскиот комесар за енергија, Ден Јоргенсен, предупредува дека развојот на настаните може директно да се одрази врз патувањата низ континентот, вклучително и летниот туристички пик.
Според него, граѓаните би можеле да се соочат со значително поскапи авионски билети, а не се исклучуваат ниту откажувања на летови доколку притисокот врз пазарот продолжи. „Дури и со максимални напори за стабилизација, без доволно гориво авионскиот сообраќај едноставно не може да функционира нормално“, порачува тој, нагласувајќи дека најголемата неизвесност е дали ценовната нестабилност ќе прерасне во физички недостиг.
Дополнителна загриженост предизвикува и потенцијалното повторно отворање или блокирање на стратешки поморски правци како Ормускиот теснец, што би можело уште повеќе да ја наруши глобалната енергетска рамнотежа. Дури и во оптимистички сценарија, според европските процени, високите цени на енергенсите би можеле да останат присутни подолг период поради оштетена или прекината инфраструктура во клучни региони.
Авиокомпаниите веќе реагираат на новите услови. Еден од најголемите европски превозници, групацијата „Луфтханза“, најави значително намалување на бројот на летови во наредните месеци, со илјадници откажувања во рамки на прилагодување кон зголемените трошоци. Други компании, пак, веќе ги коригираат цените на долги дестинации во обид да ги компензираат поскапите енергетски ресурси.
Од Италија доаѓаат дополнителни предупредувања дека патниците би било разумно да размислат за поблиски дестинации за одмор ова лето. Претставници од цивилната авијација укажуваат дека, покрај економскиот удар, психолошката несигурност кај патниците веќе влијае врз планирањето на патувањата. Тие советуваат и дополнителна претпазливост, вклучително и патничко осигурување кое покрива можни доцнења и откажувања.
Во меѓувреме, Европската унија најавува пакет мерки за ублажување на енергетскиот притисок, со фокус на забрзана транзиција кон обновливи извори на енергија, даночни олеснувања за електрична енергија и стимули за поширока употреба на електрични возила и чисти технологии во домаќинствата.
Иако институциите уверуваат дека се преземаат сите расположливи мерки за стабилизација на пазарот, неизвесноста останува висока, а летната туристичка сезона во Европа влегува во период на зголемена економска и логистичка нестабилност.
…
