Во срцето на Битола, на Широк Сокак и во непосредна близина на плоштадот Магнолија, започна реконструкцијата на еден од најпрепознатливите и највпечатливи објекти од градското архитектонско наследство – познатата куќа „Алхамбра“. Според описот на објектот, станува збор за историска градба што со децении претставува дел од визуелниот и културниот идентитет на Битола, препознатлива по својот ориентален дух, декоративност и силно присуство во старото градско јадро.
Објектот, кој во минатото бил познат и како Солунска банка, претставува значаен сведок на урбаниот развој на Битола од крајот на 19-тиот и почетокот на 20-тиот век. Неговата архитектура, според достапните податоци, ги спојува историските слоеви на градот, неокласичните влијанија и препознатливите декоративни елементи што кај битолчани ја втемелиле популарната називка „Алхамбра“.
Реконструкцијата на овој значаен објект е доверена на градежната компанија Стентон Градба од Битола, која како изведувач ќе работи на обновување и зачувување на неговата автентичност, со посебно внимание кон историската и архитектонската вредност на градбата.
Во рамки на реконструкцијата е предвидено поставување на внатрешен лифт, со цел да се обезбеди пристапност и непречено користење на објектот за лица со инвалидност и лица со намалена мобилност. Бидејќи куќата е заштитена како историско културно наследство, лифтот ќе биде вграден без уривање и без видоизменување на внатрешната и надворешната архитектура. Решението е усогласено со Правилникот за начинот на обезбедување на непречен пристап, движење, престој и работа на лицата со инвалидност до и во градбите („Сл. весник“ бр. 25/10), како и со стандардите МКС EN 81-41:2025 и МКС EN 81-70:2021+A1:2022, кои ги уредуваат безбедноста и пристапноста на лифтовите за лица со оштетена мобилност.
Со отпочнувањето на овие активности, „Алхамбра“ добива нова перспектива и можност повторно да го заземе заслуженото место во урбаниот живот на Битола. Ваквите зафати имаат особено значење за зачувување на културната меморија на градот, но и за враќање на сјајот на објекти што имаат симболична, естетска и историска вредност за локалната заедница.
За Стентон Градба, реконструкцијата на „Алхамбра“ претставува особена чест и одговорност, како компанија од Битола, длабоко поврзана со развојот и унапредувањето на локалниот простор.
Реконструкцијата на „Алхамбра“ не е само градежен зафат, туку и вложување во зачувувањето на препознатливото битолско наследство – за сегашните и идните генерации.
…
