Проблематичната делница меѓу Евзони и Солун, позната по честите сообраќајни несреќи и тесниот профил, конечно добива нов лик. Грчките власти започнаа обемен инфраструктурен проект со кој овој пат ќе биде целосно реконструиран и проширен во современ автопат, со цел значително да се подобри безбедноста и протокот на возила.
Станува збор за една од најоптоварените копнени врски кон Грција, особено за патниците од Балканот кои преку граничниот премин Евзони се упатуваат кон Солун, Халкидики и јужните делови на земјата. Со години, оваа рута беше означувана како ризична, со бројни сериозни несреќи, недоволна сигнализација и отсуство на основна инфраструктура како осветлување и физичко раздвојување на сообраќајот.
Градежните работи официјално започнаа во февруари 2026 година. На терен се ангажирани стотици работници и механизација, а во моментов се активни неколку градилишта долж трасата. Централниот сегмент на проектот е делницата Халастра–Поликастро, долга околу 44 километри, која досега функционираше со по една лента во секој правец и без средишна бариера.
Планот предвидува изградба на автопат со по две ленти во секој правец, како и дополнителна застанувачка лента. Сообраќајот ќе биде физички одвоен со централно острово, а ќе се изврши и комплетна замена на асфалтот. Во рамки на модернизацијата ќе се реконструираат мостови, ќе се постави нова вертикална и хоризонтална сигнализација, заштитни огради и современо осветлување.
Освен основната патна инфраструктура, проектот опфаќа и изградба на придружни содржини. Планирани се повеќе сервисни зони со бензински станици и угостителски објекти, како и одморишта и паркинзи за патниците.
Иако официјалниот рок за завршување е 2031 година, дел од проценките укажуваат дека, поради поволниот терен, изградбата може да се одвива побрзо од предвиденото.
Паралелно со ова, се најавува и проширување на капацитетите на граничниот премин Евзони, со значајна инвестиција која треба да го намали времето на чекање и да го подобри протокот на патници.
…
