Премиерот Христијан Мицкоски изјави дека Владата продолжува со спроведување на Реформската агенда и оти, според него, нема застој во процесот, туку напротив – земјата бележи напредок и се приближува до групата на земји предводници во реформските процеси.
Како што информираше тој од Охрид, на синоќешниот состанок со ресорните министри било оценето дека од вкупно десет заостанати обврски, најголем дел ќе бидат реализирани до крајот на јуни. Сепак, две од нив нема да бидат спроведени.
Првата обврска се однесува на барањето државата да не обезбедува 100 отсто снабдување со електрична енергија за домаќинствата и дел од корисниците. Според премиерот, прифаќањето на таков чекор би довело до зголемување на сметките за струја за 25 до 30 проценти, поради што Владата одлучила да не го реализира.
Втората обврска е поврзана со Изборниот законик, за кој, како што рече, е потребен широк политички консензус во Собранието. Мицкоски посочи дека работната група во која учествувала и опозицијата од СДСМ ја напуштила работата, што го блокира понатамошниот процес.
Тој додаде дека останатите обврски од реформската агенда ќе бидат целосно испорачани, обвинувајќи ја опозицијата дека преку, како што рече, дезинформации се обидува да создаде впечаток за застој во реформите.
…
