Сериозна здравствена криза на бродот „MV Hondius“ предизвика меѓународна тревога, откако смртоносна инфекција пренесена од глодари однесе три животи меѓу патниците.
Според информациите што ги објавуваат странските медиуми, меѓу кои и „Дејли меил“, се сомнева дека вирусот можеби бил внесен на бродот од холандска двојка. Тие, пред да се качат, наводно престојувале во близина на депонија во аргентинскиот град Ушуаја, каде што фотографирале птици и потенцијално дошле во контакт со заразени глодари.
Ситуацијата брзо ескалирала по појавата на првите случаи на бродот. Тројца патници, државјани на Велика Британија, Холандија и Германија, биле итно евакуирани, додека останатите патници и екипажот се ставени под строг медицински надзор и изолација.
Во меѓувреме, повеќе од 20 британски туристи се подготвуваат за враќање во своите матични земји, но ги очекува долг карантин кој може да трае и до осум недели, период што се смета за максимална инкубација на болеста.
Бродот, според последните информации, треба да се закотви на Канарските Острови, по одлука на шпанските власти кои инсистирале патниците да добијат итна медицинска помош, и покрај загриженоста на локалните структури дека постои ризик од натамошно ширење на заразата.
Дополнителна загриженост предизвика и случај во Швајцарија, каде еден патник развил симптоми по враќањето дома и моментално е во изолација.
Станува збор за ретка болест со висока стапка на смртност, проценета на околу 40 проценти, а анализите покажуваат дека се работи за сој на хантавирусот од Андите, единствениот за кој е познато дека може да се пренесува меѓу луѓе.
И покрај сериозноста на случајот, Светската здравствена организација оценува дека моменталната ситуација не укажува на ризик од сценарио слично на почетокот на пандемијата со Ковид-19. Здравствените власти, пак, уверуваат дека опасноста за пошироката јавност останува ниска, додека патниците на бродот се под постојан надзор и контрола.
…
