Со приближувањето на летната сезона и зголемениот број туристи кои заминуваат кон грчките плажи, сè повеќе возачи однапред ги проверуваат цените на горивата во Грција со цел да ги намалат трошоците за патување.
Според најновите податоци за просечните цени на бензините и дизелот на грчките бензински пумпи, разликите меѓу брендовите и регионите се значителни, па внимателниот избор на пумпа може да донесе сериозна заштеда, особено за оние што патуваат на подолги релации.
Меѓу најевтините опции за бензин моментално се издвојува брендот „Jetoil“, каде литар бензин чини околу 1,98 евра. Нешто пониски од просекот се и „Cyclon“ и „Avin“, со цени околу 2,01 евра по литар.
Кај „Revoil“ и „Shell“ цените се движат околу 2,02 евра, додека меѓу поскапите бензински компании се „EKO“ и „Elin“, каде бензинот надминува 2,03 евра за литар.
Разлики има и кај дизелот. Најниска цена повторно нуди „Jetoil“, каде литар дизел чини околу 1,82 евра, додека кај „EKO“, „Elin“ и „Silk Oil“ цените достигнуваат до 1,94 евра.
За возачите што користат ТНГ (LPG), најисплатливи се „Jetoil“ и „EKO“, каде цените се движат меѓу 1,21 и 1,31 евра по литар.
Експертите предупредуваат дека цените во Грција постојано варираат и зависат од повеќе фактори – регионот, близината до туристичките центри, автопатите, островите и сезонската побарувачка. Поради тоа, на возачите им се препорачува пред патување да користат мобилни апликации како „FuelGR“ и „MyFuel“, кои во реално време покажуваат каде горивото е најевтино.
Во споредба со Грција, горивата во Бугарија и понатаму остануваат значително поевтини. Таму бензинот моментално се движи од околу 1,49 до 1,52 евра за литар, поради што дел од македонските возачи и понатаму избираат да наполнат резервоар пред влез во Грција.
Со очекуваните летни гужви и растот на цените на светските пазари, аналитичарите предупредуваат дека горивата во наредниот период би можеле дополнително да поскапат, па навременото планирање на патувањето и изборот на бензинска пумпа може значително да влијаат врз вкупниот буџет за одмор.
….
