Грчки државјанин од „бродот на смртта“ ставен во 45-дневен строг карантин поради хантавирус
Грција воведува строги безбедносни мерки поради смртоносната епидемија на хантавирус поврзана со експедицискиот крузер MV Hondius, откако грчки државјанин кој се наоѓа на бродот ќе биде ставен во задолжителен 45-дневен карантин во Атина.
Според информациите од Министерство за здравство на Грција, станува збор за 70-годишен маж кој во моментов не покажува никакви симптоми и е во добра здравствена состојба, но сепак ќе биде третиран како високоризичен контакт поради можната изложеност на вирусот.
Властите соопштија дека мажот ќе биде евакуиран од бродот и транспортиран со специјален лет на грчките воздухопловни сили.
Прво ќе биде пренесен од Канарски Острови до аеродромот во Ајндховен, а потоа ќе биде транспортиран во Атина.
По пристигнувањето во Грција, тој ќе биде сместен во специјално опремена болничка соба со негативен притисок, каде ќе остане под строг медицински надзор и задолжителен карантин во времетраење од 45 дена.
Случајот предизвика сериозна загриженост кај европските здравствени власти, особено по смртта на тројца патници од бродот „Хондиус“ – холандски брачен пар и една германска државјанка.
Дополнително, уште неколку лица на бродот се разболеле од ретката инфекција, која најчесто се пренесува преку контакт со глодари и нивниот измет или урина.
Според експертите, вирусот е особено опасен бидејќи станува збор за реткиот сој „Андес“, единствениот познат хантавирус што може да се пренесува и од човек на човек.
Бродот испловил од Аргентина во април, каде што хантавирусот е ендемски во одредени региони.
Здравствените власти предупредуваат дека засега не постои вакцина ниту специфичен третман за хантавирусот, поради што се применуваат строги карантински мерки и следење на сите патници и контакти од бродот.
Епидемијата на „бродот на смртта“, како што веќе го нарекуваат некои медиуми, предизвика меѓународна тревога и засилени здравствени контроли во повеќе европски земји.
