Во пресрет на Светското првенство во спортски риболов на крап, кое идната година ќе се одржи на Мавровското Езеро, деновиве се засилуваат подготовките на теренот во рамки на Националниот парк „Маврово“.
Како дел од првата поголема акција за унапредување на рибниот фонд, вчера во езерото беа пуштени околу 2.000 килограми крап. Од Јавната установа Национален парк „Маврово“ информираат дека ова е само почеток на пошироката програма за порибување, која ќе продолжи и во наредниот период со нови активности насочени кон збогатување на водниот екосистем.
Истовремено, од денес стапува во сила забрана за лов на крап во водите на Мавровското Езеро. Мерката ќе остане на сила сè до завршувањето на светското натпреварување, со цел да се обезбедат оптимални услови за подготовка и одржување на настанот.
Од управата на паркот нагласуваат дека активностите се реализираат во тесна координација со Македонската риболовна федерација, како дел од заедничката стратегија за промоција на спортскиот риболов и развој на риболовниот туризам во регионот. Според нив, ваквите инвестиции во рибниот фонд треба да придонесат Маврово да се позиционира како атрактивна дестинација за меѓународни спортски случувања.
Светското првенство во риболов на крап е закажано за септември 2026 година, а подготовките за негово организирање веќе подолг период се во тек. Во март годинава беше потпишан и меморандум за соработка меѓу локалната самоуправа, Националниот парк „Маврово“ и Македонската риболовна федерација, со кој се поставија основите за заедничко спроведување на настанот.
…
