Во духот на традицијата, историјата и културното наследство, Општина Прилеп и оваа година ја организира манифестацијата „Денови на Крали Марко“, посветена на легендарниот јунак Крал Марко, симбол на храброста, правдата и непокорот.
Градоначалникот на Прилеп, Дејан Проданоски, истакна дека преку оваа манифестација се негуваат вредностите и се оживува богатата легенда која е длабоко вкоренета во идентитетот на градот.
„Преку повеќе едукативни работилници, културни и забавни содржини, градот под Марковите Кули уште еднаш ќе ја оживее богатата легенда и духот на еден од најпрепознатливите симболи на Прилеп. Ги покануваме сите граѓани и посетители да бидат дел од оваа традиционална манифестација и заедно да ги славиме историјата, културата и препознатливоста на нашиот Прилеп“, порача Проданоски.
Манифестацијата „Денови на Крали Марко“ и оваа година ќе понуди разновидни активности, со кои ќе се доближи легендата за Крал Марко до најмладите генерации, но и до сите љубители на историјата и културата.
Со овој настан, Прилеп уште еднаш ја потврдува својата посветеност кон зачувување и промоција на културното наследство и традицијата што го прават градот препознатлив.
…
