Во средните училишта низ земјата за вториот уписен рок се достапни 11.882 слободни места за учениците кои не успеале да се запишат во првиот јунски рок, соопшти Министерството за образование и наука.
На првото електронско пријавување, кое се одвиваше од 12 до 15 јуни, аплицирале вкупно 15.075 ученици. Од нив, 13.397 веќе се запишани во средните училишта за учебната 2026/2027 година.
Според податоците, најголем дел од учениците се запишале на настава на македонски јазик, додека останатите места се распределени во паралелки на албански, турски и српски наставен јазик.
Второто пријавување е закажано за 23 јуни, по што на 24 јуни ќе се доставува потребната документација до училиштата. Конечните резултати ќе бидат објавени на 25 јуни.
Во училиштата каде што ќе има поголем интерес и кандидати со ист број бодови, на 29 јуни ќе се организира квалификациско тестирање.
…
