Тензиите меѓу Техеран и Вашингтон повторно зовреа откако Иран испрати директна и остра порака до американскиот претседател Доналд Трамп, непосредно пред неговата најавена посета на Пекинг и средбата со кинескиот претседател Си Џинпинг.
Али Акбар Велајати, еден од највлијателните советници на иранскиот врховен лидер, предупреди дека Белата куќа прави сериозна грешка ако актуелното затишје во конфликтот го толкува како американска победа.
„Господине Трамп, немојте да се залажувате дека со сегашното затишје во Иран ќе можете триумфално да пристигнете во Пекинг“, порача Велајати, во изјава што ја објави иранската полуофицијална агенција Тасним.
Тој нагласи дека, според Техеран, САД веќе доживеале пораз во директната конфронтација со Иран и предупреди Вашингтон да не очекува дипломатски триумф по воените случувања.
„Ние ве поразивме на теренот. Затоа не верувајте дека ќе успеете да се претставите како победници и на дипломатската сцена“, изјави Велајати.
Заканувачката реторика доаѓа во момент кога односите меѓу двете држави остануваат крајно нестабилни, иако официјално е во сила едномесечно примирје. Самиот Трамп неодамна оцени дека договорениот прекин на огнот е „на апарати“, алудирајќи на неговата неизвесна иднина.
Во меѓувреме, и покрај формалното примирје, регионот не мирува. Во Ормускиот теснец, една од најчувствителните стратешки точки за светската нафта и поморски транспорт, продолжија инцидентите, нападите и меѓусебните провокации, што дополнително ја зголемува опасноста од нова ескалација на конфликтот.
…
