Европската унија воведува нова рунда построги правила насочени кон заштита на децата и младите од, како што го опишува Брисел, „зависничкиот дизајн“ на социјалните мрежи, меѓу кои се TikTok, Facebook, Instagram и платформата X.
Претседателката на Европската комисија, Урсула фон дер Лајен, во изјава во Копенхаген предупреди дека растечките проблеми кај младите не можат да се третираат како случајност или индивидуални случаи. Според неа, сè почесто се забележуваат последици како нарушен сон, анксиозност, депресивни состојби, самоповредување, онлајн злоупотреба и различни форми на зависност: појави кои, како што истакна, се поттикнати од самата логика на дигиталните платформи.
Таа посочи дека бизнис моделите на големите технолошки компании се темелат на максимално задржување на вниманието на корисниците, при што децата и адолесцентите стануваат особено ранлива група. „Вниманието се претвора во производ“, порача таа, нагласувајќи дека тоа бара посериозна регулаторна реакција.
Во таа насока, Европската комисија работи на нов законски пакет, Закон за дигитална праведност (DFA), кој би требало да биде предложен до крајот на годината. Со него се предвидуваат поостри правила против манипулативни и зависнички елементи во дизајнот на платформите, како и дополнителни ограничувања за употребата на вештачка интелигенција во социјалните мрежи. Меѓу разгледуваните мерки е и воведување минимална возраст за пристап до одредени платформи.
Овие нови иницијативи би го надградиле постојниот Закон за дигитални услуги, кој веќе им наложува на големите платформи поактивно да се справуваат со нелегална и штетна содржина. Во меѓувреме, Комисијата отвори и неколку истраги против TikTok, X, Instagram и Facebook, поврзани со елементи како бесконечно скролање, автоматско пуштање содржини и агресивни push известувања.
Покрај тоа, според информации пренесени од „Ројтерс“, започната е и постапка против платформата X во врска со користење на вештачката интелигенција „Грок“, која наводно била искористена за создавање сексуално експлицитни слики со жени и деца.
…
