Во Таџикистан се одржува 35-тата Регионална конференција за Европа и Централна Азија на Организација за храна и земјоделство при ОН (FAO), еден од највлијателните меѓународни собири посветени на иднината на земјоделството, безбедноста на храната и одржливиот рурален развој. Настанот обединува високи владини претставници, министри и експерти од целиот регион, со цел дефинирање на нови насоки за агро-прехранбените политики во услови на брзи глобални промени.
Република Македонија на конференцијата ја претставува заменик-министерот за земјоделство, шумарство и водостопанство Албрим Хоџа, кој активно учествува во дискусиите на високо ниво. Во фокусот на разговорите се климатските предизвици, дигиталната трансформација на земјоделството, зачувувањето на биодиверзитетот и зајакнувањето на отпорноста на агро-прехранбените системи.
Покрај пленарните сесии, Хоџа се вклучува и во тематски панели посветени на иновациите во руралниот развој и унапредувањето на регионалната соработка, каде се разменуваат искуства и практики за модернизација на земјоделскиот сектор.
Еден од поважните моменти на учеството на македонската делегација е изборот на заменик-министерот Хоџа за потпретседавач на конференцијата, со што Македонија добива видливо место во раководните структури на овој значаен регионален форум.
Паралелно со официјалната програма, се одвиваат и низа билатерални средби со претставници од земјите учеснички и со раководството на Организација за храна и земјоделство при ОН (FAO), насочени кон продлабочување на соработката и размена на искуства во областа на земјоделството и руралниот развој.
…
