Во духот на зајакнување на регионалната безбедносна соработка и продлабочување на односите меѓу двете сојузнички армии, началникот на Генералштабот на Армијата, генерал-мајор Сашко Лафчиски, престојуваше во официјална посета на Вооружените сили на Република Албанија во Тирана, каде што оствари низа средби на највисоко воено и државно ниво.
Посетата започна со прием во албанската престолнина, каде што генералот Лафчиски беше пречекан со високи воени почести. Во рамки на агендата, тој одржа одвоени разговори со својот албански колега, началникот на Генералштабот на ВС на Албанија, генерал-потполковник Арбен Кинџи, како и со министерот за одбрана Ермал Нуфи. Во фокусот на овие состаноци беа актуелните безбедносни предизвици во регионот, можностите за продлабочување на воената соработка и заедничкото учество во рамки на НАТО-мисиите и активности.
Дополнителна тежина на посетата ѝ даде и средбата со претседателот на Република Албанија, Бајрам Бегај, на која беа разменети ставови за безбедносната состојба во поширокиот регион и улогата на сојузничките држави во зачувување на стабилноста. Двете страни ја истакнаа континуираната и веќе воспоставена добра соработка меѓу армиите, особено преку заеднички обуки, вежби и ангажман во рамките на НАТО, што се оценува како важен столб на колективната безбедност.
Разговорите меѓу началниците на генералштабовите беа насочени кон конкретни чекори за натамошно унапредување на оперативната соработка – од заеднички вежби и обуки, до користење на расположливите капацитети на двете армии и координирано делување во кризни ситуации. Акцент беше ставен и на зголемување на интероперабилноста во меѓународните операции, како и на заедничкиот одговор на современите безбедносни закани.
Посебен сегмент од посетата беше и запознавањето со капацитетите на Полкот за специјални операции на Вооружените сили на Албанија. Македонската делегација имаше можност директно да се информира за мисијата и задачите на единицата, како и да проследи демонстрација на дел од нејзините оперативни способности.
Од Генералштабот на Армијата порачуваат дека ваквите средби претставуваат значаен чекор во континуираното унапредување на билатералната соработка, која веќе е силно развиена во областа на военото образование, обуките и заедничките активности во рамки на регионалните иницијативи како Јадранската повелба, SEDM процесот и форумот на началници на генералштабови од балканските земји. Според нив, посетата на Албанија уште еднаш ја потврдува определбата за заедничко дејствување и зацврстување на регионалната стабилност и безбедност.
…
