Просечната должина на работната недела во Европската Унија и понатаму покажува јасни разлики меѓу земјите, но и благ тренд на намалување. Според податоци на Евростат, во 2025 година вработените на возраст од 20 до 64 години, без разлика дали работат полно или скратено работно време, работеле во просек по 35,9 часа неделно. Тоа е околу еден час помалку отколку пред една деценија, во 2015 година.
Сосема поинаква слика се забележува во Македонија, каде што вистинската работна недела изнесувала значително повеќе, 39,5 часа. Овој податок ја позиционира земјата над просекот на ЕУ и укажува на подолги работни обврски во споредба со голем дел од европските економии.
Разликите се уште поочигледни кога се споредува регионот. Србија се издвојува со една од најдолгите работни недели, 41,3 часа, веднаш следена од Босна и Херцеговина со 41,1 час. За разлика од нив, Хрватска бележи пократко работно време од 37,8 часа неделно.
Во рамките на Европската Унија, најинтензивни работни недели имаат вработените во Грција, каде што просекот достигнува 39,6 часа. Високо на листата се и Бугарија и Полска со по 38,7 часа, како и Литванија со 38,4 часа. На спротивниот крај на скалата се земји со значително пократко работно време, Холандија со само 31,9 часа, Данска и Германија со по 33,9 часа, како и Австрија со 34 часа неделно.
Подеталната анализа по професии открива уште појасна нерамномерност. Најдолго работат квалификуваните работници во земјоделството, шумарството и рибарството, каде што неделата трае во просек 42 часа. Следуваат менаџерите со 40,6 часа, како и припадниците на вооружените сили со 39,4 часа. Од друга страна, најкратки работни недели имаат лицата во елементарни занимања со 31,8 часа, потоа помошните работници со 34 часа и вработените во услужниот и продажниот сектор со 34,5 часа.
…
