Американскиот претседател Доналд Трамп соопшти дека во заедничка операција на американските и венецуелските безбедносни сили е убиен Хектор Растенфорд Гереро Флорес, познат како Нињо Гереро, лидер на озлогласената криминална организација „Трен де Арагва“, која американските власти ја сметаат за една од најопасните криминални и терористички групи во светот.
Во објава на својата социјална мрежа „Трут Соушл“, Трамп наведе дека ликвидацијата била извршена во прецизен воен удар реализиран од Јужната команда на САД.
„По моја наредба, Јужната команда на Соединетите Американски Држави изврши брз и смртоносен кинетички удар за успешно да го елиминира Нињо Гереро, водачот на ‘Трен де Арагва’, една од најкрволочните терористички организации на планетата“, напиша Трамп.
Американскиот претседател објави и видео на кое се гледа силна експлозија на објект за кој се тврди дека бил цел на нападот.
Операцијата спроведена со поддршка на Венецуела
Според Трамп, акцијата била реализирана во тесна координација со венецуелските власти.
„Терористите од ‘Трен де Арагва’ повеќе немаат безбедно засолниште во Венецуела ниту каде било во светот. Ќе продолжиме да ги ловиме овие убијци и наркобосови“, порача американскиот претседател.
Министерот за одбрана на САД, Пит Хегсет, потврди дека операцијата била изведена претходно оваа недела со поддршка на венецуелските безбедносни служби.
Од венецуелската влада соопштија дека акцијата вклучувала разузнавачка координација и техничка поддршка, а за време на судирите бил ликвидиран и самиот Гереро.
Кој беше Нињо Гереро?
Хектор Растенфорд Гереро Флорес, познат како Нињо Гереро, важеше за еден од најбараните бегалци во Латинска Америка.
Американскиот Стејт департмент во 2024 година понуди награда од пет милиони долари за информации што би довеле до негово апсење.
Во декември истата година против него беше подигнато обвинение во федералниот суд во Њујорк за организирање и нарачување терористички акти на територијата на САД.
Гереро беше лидер на криминалната организација „Трен де Арагва“, која потекнува од венецуелскиот затвор „Токорон“ во државата Арагуа.
Според американските и венецуелските власти, организацијата е поврзана со трговија со луѓе, шверц на дрога, перење пари, изнуда, киднапирања и други форми на организиран криминал.
Од затворска банда до меѓународна криминална мрежа
„Трен де Арагва“ првично била формирана во затворот „Токорон“, каде што членовите практично воспоставиле паралелна власт. Според истрагите, во рамките на затворот биле изградени базени, ресторани и други содржини кои ги контролирала организацијата.
Кога венецуелските власти во октомври 2023 година го презедоа затворот, Гереро успеа да избега и оттогаш беше во бегство.
Во меѓувреме, криминалната мрежа ги прошири своите активности низ повеќе земји во Латинска Америка, САД и Европа, вклучувајќи ја и Шпанија.
Трамп ја прогласи организацијата за терористичка
На почетокот на својот втор претседателски мандат, администрацијата на Трамп ја прогласи „Трен де Арагва“ за странска терористичка организација и започна засилена кампања против наркокартелите и организираниот криминал.
Трамп во својата изјава повторно го обвини поранешниот претседател Џо Бајден за слаб пристап кон безбедноста на јужната граница на САД и порача дека неговата администрација ќе продолжи со агресивната борба против криминалните групи.
Американските власти наведуваат дека од септември минатата година во операциите против наркомрежите во Карибите и источниот Пацифик се ликвидирани повеќе од 200 осомничени лица поврзани со организираниот криминал.
Со ликвидацијата на Нињо Гереро, Вашингтон ја претставува акцијата како еден од најголемите удари врз транснационалниот криминал во последните години.
ВИДЕОТО ОД ЛИКВИДАЦИЈАТА ПОГЛЕДНЕТЕ ГО ТУКА
