Во Германија се подготвува нов пензиски пакет со 30 мерки што би донеле значајни промени во пензискиот систем, меѓу кои и постепено продолжување на работниот век и укинување на можноста за предвремено пензионирање, пренесува списанието „Феникс“.
Предлозите ги изработила комисија за пензии, а тие треба да бидат претставени пред федералниот канцелар Фридрих Мерц и министерката за труд Бербел Бас на 23 јуни.
Според најавените мерки, задолжителната возраст за пензионирање постепено би се зголемувала, со цел од 2071 година да достигне 69 години, а од 2091 година да се зголеми на 70 години.
Паралелно со тоа се предлага целосно укинување на предвременото пензионирање на 63 години, кое досега важеше како една од можностите за порано повлекување од работниот процес.
Реформата предвидува и дел од пензиските придонеси да се инвестираат на пазарот на капитал, при што во почетната фаза би се издвојувал еден процентен поен, а подоцна би се зголемил на два процентни поени.
Во пакетот е вклучено и повторно воведување на таканаречениот фактор на одржливост од 2031 година, кој го поврзува растот на пензиите со бројот на осигуреници, со што би се ограничил нивниот пораст.
Дополнително, се предлага проширување на системот на задолжителни придонеси, со вклучување на политичари, самовработени лица и менаџери во акционерски друштва, додека државните службеници привремено би останале надвор од системот.
Меѓу најконтроверзните мерки е и укинувањето на таканаречените мини-работни места без придонеси, кои би останале достапни само за ученици и студенти со ограничен месечен приход.
…
