Големи сообраќајни метежи и денеска се бележат на граничниот премин „Богородица“, каде што за влез во Македонија патниците чекаат и до четири часа. Километарските колони од автомобили, автобуси, кампери и мотоцикли се формираа уште од вчера попладне, а голем број граѓани преку социјалните мрежи реагираат дека пасошките контроли се одвиваат многу бавно.
Во меѓуграничниот простор се создадени долги колони возила, додека во спротивниот правец – за излез од Македонија и влез во Грција – во моментов нема поголеми задржувања, за разлика од претпладневните часови кога и таму имаше зголемена фреквенција.
Дополнителен проблем претставуваат високите температури, кои значително ја отежнуваат состојбата за патниците што со часови чекаат во возилата. Меѓу нив има и голем број семејства со мали деца, поради што се препорачува секој што патува редовно да ја следи состојбата на граничните премини преку информациите на Авто-мото сојузот на Македонија.
Како препорака, патувањето да се планира во доцните вечерни часови, кога температурите се пониски. Иако тоа не значи дека времето на чекање ќе биде значително пократко, сепак ќе се избегнат екстремните горештини.
Според проценките од терен и искуствата од изминатите викенди на почетокот на летната сезона, големите задржувања на граничниот премин „Богородица“ најверојатно ќе продолжат и во текот на денешниот ден. Зголемениот број патници кои се враќаат во земјава или транзитираат кон север по продолжените викенди создава постојан притисок врз граничните служби.
На патниците им се советува да тргнат со доволно вода, да бидат подготвени за подолг престој во колоните и, доколку имаат можност, да ги користат алтернативните гранични премини каде што традиционално има помала фреквенција на возила.
