Собранието го усвои новиот Закон за игрите на среќа и забавните игри, со кој се воведуваат построги правила за работа на приредувачите, засилен државен надзор и нови мерки за заштита на граѓаните и спречување на злоупотребите.
Со новото законско решение се предвидува регулирање на giveaway-акциите, за кои отсега ќе биде потребна дозвола и плаќање соодветен надоместок. Исто така, приредувањето на лотариски, електронски и интернет игри на среќа ќе биде исклучиво право на државата, кое ќе се реализира преку трговско друштво во државна сопственост.
Законот воведува и критериуми за интегритет и соодветност за лицата кои управуваат со компаниите што поседуваат лиценци, со цел усогласување со меѓународните стандарди за спречување перење пари и финансиски злоупотреби.
Предвидени се и нови ограничувања за рекламирањето на игрите на среќа. Ќе биде забрането поставување агресивни и светлечки реклами на надворешниот дел од објектите, како и реклами што создаваат впечаток дека коцкањето е начин за финансиски успех.
Посебен акцент е ставен на заштитата на младите, па деловните простории на одредени приредувачи ќе мора да бидат оддалечени најмалку 500 метри од основните и средните училишта.
За подобра контрола, секој автомат за игри на среќа, VLT и терминал за електронски игри ќе мора да биде опремен со GPS-систем поврзан со Управата за јавни приходи, што ќе овозможи следење на нивната локација и спречување на нелегално работење.
Со законот се воведуваат и построги услови за добивање повеќе лиценци, се прошируваат можностите за нивно одземање, а се зголемуваат и казните за прекршувања.
Воедно, продолжува финансиската поддршка за ранливите категории преку средства од приредувањето игри на среќа, кои ќе бидат наменети за инвалидски организации, здруженија за борба против семејното насилство и Црвениот крст.
Според предлагачите, новиот закон треба да обезбеди поголема транспарентност, поефикасен надзор и усогласување на домашното законодавство со европските и меѓународните стандарди.
…
