Рускиот претседател Владимир Путин потпиша нова уредба со која повторно се зголемува бројот на вработени во Централната управа на Федералната служба за заштита (ФСО), институција задолжена за неговата лична безбедност и заштитата на највисокото државно раководство.
Според уредбата, максималниот број на воени и цивилни вработени во централната управа на ФСО се зголемува од 785 на 812 лица. Одлуката стапува во сила од 1 јули и претставува четврто зголемување на персоналот од почетокот на војната во Украина во 2022 година.
Федералната служба за заштита е една од клучните безбедносни институции во Русија, одговорна за обезбедување на претседателот, премиерот, Кремљ, парламентот и други државни објекти. Во нејзини рамки функционираат и специјализирани служби, вклучително и единици за комуникации и непосредна претседателска заштита.
Иако зголемувањето се однесува на централната управа, проценките се дека ФСО во целина брои десетици илјади припадници распоредени низ различни безбедносни задачи.
Западни медиуми и безбедносни извори во последниот период известуваат за засилени мерки за заштита на Путин, наведувајќи дека е намален бројот на негови јавни настапи и патувања, додека пристапот до него е значително построго контролиран.
Според истите извештаи, лицата кои доаѓаат во директен контакт со рускиот претседател минуваат низ дополнителни безбедносни проверки, а во одредени случаи им се ограничува користењето на електронски уреди.
Со новата уредба, безбедносниот апарат околу рускиот претседател дополнително се зајакнува, во услови на зголемени геополитички тензии и продолжена војна во Украина.
…
