Претседателот на Владата на Република Северна Македонија, Христијан Мицкоски, изјави дека пензиите за сите пензионери се зголемени линеарно за 7.000 денари, нагласувајќи дека Владата ја исполнила и надминала првичната изборна обврска за зголемување од 5.000 денари.
Одговарајќи на новинарско прашање, Мицкоски истакна дека мерката претставува значајна поддршка за пензионерите и дека има директно влијание врз подобрување на животниот стандард.
„Ние кога бевме опозиција, јасно дадовме ветување дека ќе обезбедиме линеарно зголемување од 5.000 денари за сите пензионери. Ние отидовме чекор понапред и обезбедивме 7.000 денари линеарно зголемување“, рече Мицкоски.
Тој додаде дека, според владините политики, во домаќинства со двајца пензионери зголемувањето изнесува 14.000 денари, што, како што посочи, придонесува за подостоинствен живот.
Мицкоски нагласи дека Владата ќе продолжи со мерки насочени кон подобрување на животниот стандард на граѓаните, посочувајќи дека во минатото зголемувањата на пензиите биле минимални, додека сега се реализираат значително повисоки корекции.
„Колку-толку успеавме да ги санираме предизвиците со кои се соочуваат пензионерите и ќе продолжиме да работиме во нивен интерес“, додаде тој.
