Еден припадник на Противпожарната бригада на Град Скопје е повреден при интервенцијата за гаснење на големиот пожар што попладнево избувна во објект на Јужен булевар, во близина на месноста „Рампа“. Повредениот пожарникар итно е пренесен на скопските клиники, каде му е укажана медицинска помош.
Благодарение на брзата, координирана и пожртвувана интервенција на противпожарните екипи, пожарот е ставен под контрола и локализиран во рекордно краток рок, со што е спречено негово ширење кон околните објекти и избегната е поголема материјална штета.
Градоначалникот на Општина Кисела Вода, Орце Ѓорѓиевски, потврди дека во пожарот нема настрадани граѓани, но изрази жалење поради повредата на пожарникарот кој учествувал во интервенцијата.
„За жал, еден пожарникар е повреден при интервенцијата и веднаш е пренесен на клиника. Му посакувам брзо закрепнување и изразувам огромна благодарност за неговата пожртвуваност. Скопје денес виде што значи пожртвуваност на дело“, изјави Ѓорѓиевски.
Тој истакна дека овој настан уште еднаш ја покажува опасноста со која секојдневно се соочуваат пожарникарите, нагласувајќи дека модернизацијата на Противпожарната бригада, набавката на современа опрема и подобрувањето на условите за работа остануваат меѓу приоритетите на локалните власти.
Причините за избувнувањето на пожарот засега не се официјално утврдени, а надлежните служби вршат увид и работат на расчистување на сите околности поврзани со инцидентот.
