Управата за финансиска полиција поднесе кривична пријава до Основното јавно обвинителство во Штип против две физички лица и едно правно лице поради сомнение дека со незаконски дејствија намерно ја довеле компанијата до стечај, при што биле оштетени доверителите, а за себе и блиски лица прибавиле значителна противправна имотна корист.
Според соопштението, кривичната пријава е поднесена против управителот и сопственик на компанијата Ѓ, објави 4news.mk З., второпријавениот А. С. и самото правно лице, поради основано сомнение за сторени кривични дела „Намерно предизвикување стечај“ и „Оштетување или повластување на доверители“.
Како што наведува Финансиската полиција, во периодот од 2022 до 2024 година, двајцата осомничени дејствувале заеднички со однапред утврдена намера да го доведат правниот субјект во привидна финансиска немоќ и економска пропаст.
Во рамки на тие активности, тие склучувале штетни договори и пренесувале парични средства и друг имот на лица блиски до првопријавениот, без реален правен и економски основ. Дополнително, управителот отуѓувал движен и недвижен имот во сопственост на компанијата по цени значително пониски од нивната пазарна вредност, без економска оправданост и на штета на друштвото и неговите доверители.
Според истрагата, со ваквите дејствија континуирано се извлекувале средства од компанијата, со што значително се намалила вредноста на нејзиниот имот и се оневозможило доверителите да ги наплатат своите побарувања. Како последица, друштвото било доведено во состојба на трајна неликвидност и неспособност за исполнување на обврските, по што била отворена стечајна постапка.
Од Управата за финансиска полиција информираат дека со наведените дејствија доверителите биле оштетени за 13.268.816 денари, додека осомничените за себе и лица во роднинска врска прибавиле противправна имотна корист во износ од 73.538.152 денари.
…
